[f° 345 v°]
Le XXIII^e jour d'octobre, l’an mil IIII^c LXI, en l'ostel de ladicte ville, en la presence de honnorable homme Baudet Berthelot, lieuxtenant particulier a Tours et ou ressort du bailli de Touraine, se sont assemblez :

Les esleuz et commis pour les gens d'Eglise de ladicte ville ;

Maistre Françoys Thouars, vicaire de tres reverend Pere en Dieu monseigneur l’arcevesque de Tours, et aussi chanoine de l’eglise de Tours, et soy representant tant pour ledit reverend que pour les doyen, tresorier et chappitre de ladicte eglise ;

maistre André Du Beuf, chanoine de l’eglise monseigneur saint Martin, et soy representant pour les doyen, tresorier et chapitre de ladicte eglise monseigneur saint Martin ;

Jehan Ruzé, Pierre Brete, maistres Jehan Bonnart, Jehan Dupuiz et René Dreux, Pierre Laillier, Jullien Beauvarlet, Jehan Galocheau, Claude de Givonne.

Pour deliberer sur ce que on dit que madame la baillive est venue en ceste dicte ville, et qu'il soit advisé se on luy fera don, et quel, a sa nouvelle venue.

Item, aussi est bien besoing de faire don ou present a sire Pierre Berart⁽¹⁾, tresorier de France, et quel don on lui doit faire pour le recongnoistre des plaisirs qu'il a faiz et fait chacun jour a ladicte ville pour les affaires d'icelle envers le roy nostredit seigneur.

Sur quoy a esté deliberé que a madicte damaistre la baillive soit donné et baillé la somme de II^c livres tournois, qui lui seront portez par les esleuz de ladicte ville, lesquelz esleuz et autres notables gens de ladicte ville yront vers elle avant ce pour lui faire la reverence.

Item, audit sire Pierre Berart⁽¹⁾ lui sera baillé et envoyé VI traversiers du meilleur bon vin et des meilleurs sortes qu'on poura trouver et choisir en ladicte ville.

1. Pierre Bérard, trésorier de France.