[f° 346 r°]
La creacion des esleuz et du commis pour les gens d'Eglise de ladicte ville pour l’annee commançant a ceste prouchaine feste de Toussains fut faite ou chappitre de l’abbaye de Saint-Jullien de Toussains^(a) le mercredi feste saint Simon et saint Jude, XXVIII^e jour d'octobre mil CCCC LXI, en la presence de noble homme messire Jehan de Bar, chevalier, seigneur de Baugy , conseillier et general des finances du Roy nostre sire et son bailli de Touraine, maistres Guy Farineau, procureur, et Jehan De Argouges, advocat du roy nostre sire oudit bailliage, maistre Pierre Le Roy, vicaire de tres reverend Pere en Dieu monseigneur l’arcevesque de Tours, et soy representant pour ledit tres reverend, monseigneur l'abbé de Saint-Jullien de Tours, maistres Nicole De Argouges et Estienne Godeau et Guillaume Le Chanteux, chanoines de l'eglise de Tours, et eulx representans pour les doyen, tresorier et chappitre de ladicte eglise, Baudet Baudet Berthelot, lieutenant particulier de mondit seigneur le bailli, maistre André Dubeuf et messire Macé Hubaille, chanoines de l'eglise monseigneur saint Martin de Tours, et eulx representans pour les doyen, tresorier et chappitre de ladicte eglise monseigneur Saint-Martin, Jehan Ruzé, maistre Jehan Bonnart, Jehan Gandin, Jehan Joubert, Colas Lopin, maistre Philippes Boutillier, maistre Jehan Peslieu le jeune, Martin De Argouges, maistre Pierre Sohier, Geuffroy Travers, Jehan Galocheau, Martin Marquet, maistre François Bernard, Jehan de Beaune, maistre Pierre de Rennes, Mery Baudet, maistre Berthelemi Lopin, Michiel Hardoin, Jehan Garnier, Guillaume Dreux, Jehan Briçonnet le jeune, Philipon Cartier, Jehan Baron, Philipon Breton, Jehan de Fougerais, Pierre Blondelet, Gilet de Brion, maistre Jehan Burdelot, tresorier de Nevers, mesdits sires le procureur et advocatz dessusdiz, et plusieurs autres bourgeois, et habitans de ladicte ville en grant nombre.

Et apres meure deliberacion eue sur ce entreulx ont nommez pour esleuz pour ladicte ville quatre gens de ladicte ville, c'est assavoir Jehan Briçonnet et Jehan Gaudin principalment et ou eulx esleuz aussi maistre Jehan Dupuiz et Jaquet Binet, et ledit maistre Estienne Godeau, chanoine et penitancier de ladicte eglise de Tours pour commis pour lesdiz gens d'Eglise de ladicte ville de Tours quant a la distribucion des deniers communs d'icelle ville seulement, o les protestacions sur ce autrefois faites en une cedulle autrefois baillee par lesdiz gens d'Eglise ausdiz bourgeois et habitans, laquelle ils dient avoir par devers eulx. Et a esté nommé pour receveur Martin De Argouges. Et a esté deliberé par les dessusdiz, et consenti en la presence dudit bailli en ladicte assemblee, que d'ores en avant lesdiz quatre esleuz et commis pour lesdiz gens d'Eglise, ne autres esleuz et commis qui viendront chacun an apres eulx, n'auront ne ne prendront chacun plus nulz gaiges, ainsi comme ilz avoyent acoustume, mais serviront chacun a son tour, ainsi qu'ilz seront chacun an esleuz pour ladicte ville, sans avoir nulz d'iceulx gaiges, excepté ledit receveur et ses successeurs a venir esleuz oudit office de receveur des deniers de ladicte ville.

a. corrigez par : Tours.