[f° 351 r°]
Le vendredi V^e jour de mars, l'an mil IIII^c LXI, en l'ostel de la ville, en la presence de honnorable homme maistre Jehan Bernard, juge et lieutenant general de monseigneur le bailli de Touraine, et de maistre Guy Farineau, procureur du roy nostre sire oudit bailliage, se sont assemblez :

Jehan Briçonnet, maistre Jehan Dupuiz et Jehan Gaudin, esleuz de la ville de Tours ;

Maistre Jehan De Argouges, advocat du roy oudit bailliage, maistre François Bernard, Gillet de Brion, maistre Gervaise Goyet, Jehan Barbot, maistre Jehan Bonnart, Pierre Le Masle, Jehan Galocheau, maistre Jehan Lopin, Simon Perrault, Mery Baudet, Jehan Ruzé, Martin De Argouges, Julien Beauvarlet.

Pour deliberer sur ce que par les esleuz a esté mis en deliberacion, que vray est que messires des chapitres de Saint-Gatien et de Saint-Martin de Tours sont contens que les gens de la ville joyssent et usent de telz privileges que le roy leur a donnez et octroiez et de tous les articles contenuz en iceulx, mais que l'article de non traicter les gens de ladicte ville ailleurs que devant l’ordinaire n'ait aucun cours, et que au seurplus se accordent, et que ladicte article est contre les leurs privileges, et pour ce soit advisé que pour obvier a tous debatz se on leur acordera ou nom.

Sur quoy a esté deliberé qu'on ne laisse pas a poursuir les privileges telz que le roy les a donnez a ladicte ville. Et cependant soient tenuz lesdiz gens d'Eglise en parlos [pour paroles], de la maniere de cuider tousjours traicter ou eulx touchant l'article dessusdit, et veullent empescher dont ont parlé aux gens de ladicte ville, jusques a tant que on n'ait recouvert iceulx privileges et apres on apointera bien mieulx ou eulx une autre foiz.