Jehanne Caillard somme Thomas Le Coustellier, écuyer, sieur du Puy a payé les arrérages de plusieurs rentes. Ce à quoi Thomas se refuse.



[Transcription partielle] [Le 21.02.1597 :] [...] damoiselle Jehanne Caillard, au nom et comme tutrice naturelle de ses enfans en la personne de maitre Pierre Dousseau, demeurant audit Tours , par devers et a la personne de Gaillard Galland, escuyer, sieur de Vallieres Thomas Le Coustellier, escuyer, sieur du Puy auquel ladite damoiselle a dict […] elle est preste a vacquet et entendre et fournir par icelle damoiselle […] pour faire le remboursement faict au prix principal des contractz passez au profit de maitre Simon Marion, advocat en parlement, pour la somme de 500 livres tournois de rente a maitre Anne Robert, aussy advocat en parlement, la somme de 50 ecus de rente au sieur d’Aujert, conseiller en la court des aydes, pareille somme de 50 ecus de rente a la veufve et heritiers feu Teodore Berziau, sieur de Grané, la somme de 200 livres aussy de rente encores lesquels susdits ledit sieur de Vallieres Du Puy le sieur Du Puy de Vallieres et la veuve sieur de La Marcilliere(1), pere desdits mineurs, sont sollidairement obligez ausdites rentes et encores contribuer au paiement des arrerages des interets qui sont deubz et des fraiz raisonnables pendant des contractz et poursuittes sur ce faictes affin que ledit sieur de Vallieres Du Puy ait de sa part a vacquer et contribuer audit payement et rembourser rellever lesdits mineurs des interestz et fraiz pour l’advenir, et a ceste fin ladite damoiselle oudit nom a sommé, interpellé et requis ledit sieur de Vallieres Du Puy d’y entendre et vacquer en toutes dilligences […] ladite damoiselle tiendra prest sa demande dans le premier jour d’apvril prochain au logis de maitre Jehan Lambert, procureur en la court de parlement, rue du Cimetiere […] [1v°] […] [acte repris dans un deuxième temps :] Lequel sieur Du Puy a declairé et faict response que ladite damoiselle Caillart a tort et sans cause luy faict ladite sommation d’aultant qu’elle scait bien qu’elle n’a aulcune obligation contre luy pour luy faire faire le pretendu amortissement et rachapt desdites rentes et ne peult le contraindre a ce faire estant ja ledit sieur Du Puy et damoiselle Caillart en proces par devant nos sieurs des requestes du pallays a Paris pour le mesme faict ou icelluy sieur Du Puy a fourny de deffense contre sa demande d’icelle damoiselle Caillart qui est aux fins portera par ladite sommation auquel proces les parties sont en terme de produere et expect ledit sieur Du Puy obtenir sentence a son proffict et faire de[...]uter ladite damoiselle Caillart de sa demande mesmement que icelluy sieur Du Puy proteste en temps et lieu de se rendre incidemment demandeur contre ladite damoiselle Caillart pour rachapter et amortir par elle seulle ladite rente d’autant qu’elle a deniers entre ses mains apartenans au roy lequel doibt icelles rentes / ou lesquelz autrement proceddent de son bien et autre domaine et plus avant que ne se montent lesdites sommes qu’il convient paier pour lesdits rachapts et amortissement desdites rentes a scavoir deux mil trois cens quinze escuz quinze sol. tournois d’une part 1600 ecus d’autre et 1200 ecus d’autre part et sans approbation du contract d’acquest faict par ladite damoiselle Caillart des moullins de Prazay au prejudice tant d’elle mesme que dudit sieur Du Puy pour lesquelles sommes elle doibt encore les interestz depuys le temps qu’elle les tient en ses mains comme plus emplement ledit sieur Du Puy le faict et fera encore auxpres dict outre ledit sieur Du Puy sy ladite damoiselle Caillart eust voullu les sentence jugement et arrest intervenu entre elle et le sieur de La Planche, Robineau Berjelonne et ledit sieur Marion [2r°] ne fucent advenuz mesmement le dernier ou neufiesme apvril dernier passé pour raison du deguerpissement faict par ledit Bragelonne d’une maison scituee rue des Marés, faubourg Saint-Germain-des-Prez, qui vendue avoitesté par ledit feu sieur de La Marciliere audit Robinneau et ledit Robinneau audit Bragelonne sans aucunes charges lesquelles neanmoings estoit ypothecqués a ladite rente deue audit Marion a cause de laquelle seroit intervenu ledit deguerpissement et ce d’autant que ladite damoiselle Caillart avoit par devers elle et en ses mains des l’annee mil cinq cens quatre vingtz dix ladite somme de 2 315 ecus 15 sous tournois laquelle elle ne pourvoit par mieux emploier au proffict de sadite majesté puisqu’elle avoit failly a l’emploier a sa premiere deffination que de la convertir au rachapt et admortissement de ladite rente de 500 livres deue audit sieur Marion pour ce que en ce faisant elle déchargeroit d’icelle ladite maison que son dict feu mary avoyt vendue sans charges et ypothecques quoy faisant elle assopessoit tous lesdictz proces entre tans de personnes cy devant nommez et entre lesquelz damoiselle Caillard veult faire tumber sur ceulx qui n’en peuvent nier et pour son regard elle se mettoit en repos et tous ceulx qu’elle a depuis ce temps la travaillez et molestez et qu’elle continu[...] encores de jour a aultre, c’est sans doubte que si ledit sieur de La Marcelliere n’eust vendu l’ipothecque par luy baillee audict sieur Marion pourl’asseurance de sadite rente, ladite damoiselle Caillart, sa veufve n’eust par elle condempnee a admortir icelle dite rente, la faulte ne provient donc que dudict sieur et damoiselle de La Marcilliere qui seulz en doivent patir, et non ledit sieur Du Puy, lequel proteste de tous despens dommaiges et interestz par deffault d’avoir faict ce qu’elle a peu et deu faire dont et de ce que dessus avons delivré acte ausdictes parties pour leur servir et valloir en temps et lieu ce que de raison, faict [complété par la suite :] au logis dudit sieur Du Puy apres midy es presences de Guillaume et Henry Mahielz, clercs audit Tours , tesmoins.
[Signé :] Lecoustelier, P. Dousseau, P. Aubert.





Notes :

1. Jehanne Caillard, veuve de Jérôme Berziau.



text encoding initiativePowered by XTF
Centre d'Études Supérieures de la Renaissance
Cette œuvre est mise à disposition selon les termes de la Licence
Si vous utilisez ce document dans un cadre de recherche, merci de citer cette URL :
https://renumar.univ-tours.fr/xtf/view?docId=tei/TIPO639933.xml&doc.view=print;chunk.id=n1
Creative Commons Attribution - Pas d’Utilisation Commerciale - Partage dans les Mêmes Conditions 4.0 (CC BY-NC-SA 4.0).
Creative Commons Attribution - Pas d’Utilisation Commerciale - Partage dans les Mêmes Conditions 4.0 (CC BY-NC-SA 4.0)