1585, 13 mars — Tours

Domine ne in furere tua arguas me neque in via tuas tua corripias me Au Ou nom du pere du filz et du Sainct esprit Je Martin de Beaune, parroissien de Sainct-Hillaire je recommande mon ame a Dieu mon createur glorieulx roy de paradis a la benoiste glorieurse Vierge Marye sa mere et notre advocate envers son benoist filz Jhesus Crist a monsieur Saint Michel, Saint Pierre, Saint Martin, Saint Claude a Ma Dame Sainte Marthe, Saint Marie Magdelaine et a Ma Dame Sainte Genevefve et a tous les saincts et sainctes de paradis et compaignye celestielle requerant humblement que a ma pauvre ame quant par l’ordonnance de Dieu mon pere et createur elle partira de mon miserable corps ilz veuillent estre escu et deffence contre la force de l’ennemy d’enfer et la recepvoir entre les sainctes ames en la joye de paradis qui jamays ne finira protestanst qu’il me deplaist grandement de ne la pouvoir rendre intacte et non macullée de tant d’ordures [1v°] peches et offances que j’ay commis (comme humain et fragille) me l’ayant donnee et creé a sa semblance non macullee toutesfoys voyant que notre Dieu n’a point espargné son filz pour moy je me tient certain en sa grandeur et mi saincte misericorde si luy plaist que combien qu’il soyt juste la grande justice executee a son filz me servira dont je le supplye tres humblement.
Quant a mon corps, il sera rendu a la tere et porté au couvent des Cordelliers de ceste ville de Tours pres feu mon pere ma mere et ma seur de La Chasetiere jusques au jour que par la volluncté de Dieu il sera rendu a la beatitude et celeste vision
Je veil vivre et mourir en la foy catholicque universelle apostolicque et romaine institué de Jhesus Crist confiermee par les escriptz et traditions des apostres et tout de sainctz peres
Et pour le droict de sepulture je donne ausdits Cordelliers cinq escuz sol. une foys payee
Je veulx et ordonne que avoir les quatre mendiens et les mynimes dictz les bons hommes a chacun des [2r°] quelz cinq ordres je donne deux escuz sol. pour conduire mon corps a la terre et de dire a mon intention vigille et grand messe de requiem en leur couvent et a chacune croix desdits cinq couvents deux torches de chacune de deux livres garnyes d’armoyrie chacune de deux armoyries qu’ilz emporteront pour conduire leur chacun leur croix.
Item, je veulx avoir treize torches chacune de deux livres avecques armoyries et ung sceau de X livres poysant ledit sceau porté par ung pauvre ayant robbe et chapperon a la teste de drapd noyer et quant ausdites torches seront portees par treize pauvres ayant chacun deux aulnes de bon bureau si mes heretiers ne leur en donnent de noyr qui seroyt myeulx pour leur honneur et III sous par chacun jour ausdits XIII pauvres par dessus oultre leur leursdites robbes ou bureau
Item, je veulx avoyr six cierges de chacun de deux livres quatre a mondit corps et deux au grant autel et a chacun petit autel deux de chacun demye livre pour dire les petites messes.
[2v°] Je ordonne troys services consecutifs estre dictz audit couvent des Cordelliers par troys jours consecutifz a chacun des quelz il sera dict vespres et vigilles des trespasses / troys grand messes / savoyr du Saint-Esprit Notre-Dame du jour de la visitation et des trespasses et XXV pet petites messes si ce presentes chappellains la letanie par deux foys savoyr le jour de mon enterrement et au dernier service et pour l’offrande des liers qui demoureront audit couvent
Je ordonne estre dict audit couvent des Cordelliers ung trantain et a la fin du quel on commancera ung aumiel et seront payés de toutes lesdits services a leur contentement et sellon raison.
Je ordonne avoyr ung drapd de damacs noyer ayant la croix de satin blanc avecques le garniture d’une chappelle savoyr d’un chap choisuble le hault et le bas de l’autel le tout garny de croix de satin blanc et des mes armoyries et donne le tout audit couvent protestant que ce n’est pas pour gloire que j’ay employé ce present article mays je veu et congneu que beaucoup de [3r°] parentz par ce jourd’huy se excusent sur les testamentz pour n’avoir rien est demandé par aucuns.
L’an rev
Je ordonne estre dict a la parroisse ou je decedderay ung service acomply avecques six cierges de deux livres le piece et C sous une foys payé que je donne a la bryste des trespasses.
Je ordonne estre dict ausdits couvents des Augustins, Jacobins et les Bon Bons Hommes ung trantain et a la fin de chacune messe ung subvenite par les nonces de chacun couvent a chacun desquelz je leur donne troys escuz sol. une fois payé.
L’an revollu, je ordonne estre dict audit couvent des Cordelliers ung service entier comme a mon enterrement et XXV petites messes s’il est possible avecques deux torches de chacune de deux livres et six cierges de chacun une livre et des present aux petitz aultelz de demye livre les deux et pour l’effect des liurs comme aux aultres services.
Je ordonne estre dict a jamays audit couvent des Cordelliers ce qu’il s’ensuict. Savoir deux petites messes basses par chacune sepmaine le jeudi pour feu mon pere et mere qui sera dicte de saint sacrement avecques l’oraison [3v°] deus qui nos patrem et matrem honnorare / etc. / et l’autre petite messe le jour de mon deces avec des profondis par chacune au lieu des sepultures et pour chacune messe diz livres de rente. Plus cinq annivers aniversaires par chacun an, le premier pour feu mon pere que le XXII^e de septembre jour de son deces, le second pour feue ma mere le IIII^e de novembre, le tiers le VIII^e dudit moys de novembre pour mes parentz et amys le IIII^e pour feue ma sœur de La Chassetiere, le XX^e du moys d’apvril, le cinqiesme le jour de mon deces et pour chacun service XV sous tournois qui font la somme de X livres tournois. Item, le jour de madame saincte Anne, ung subvenite que lesdits Cordelliers yront dire aux Augustins en la chappelle de feue ma femme et pour ce cy XII sous tournois. Item, une messe basse et ung salut le tout par chacun an di[…] les octanes de la feste dieu a commancer ledit jour de ladite feste et pour ce cy IIII livres.
Item, troys messes basses par chacune sepmaine de caresme avecques l’alosu l’absolution aux jours destinez de la dire et de profondis sur ma sepulture et pour ce cy C VIII sous le tout montant quarente livres de rente par an a prandre sur [Main du notaire :] mes heritaiges et biens immeubles specialement sur cinquante livres de renteconstituee par Baudres de Maille, Jehan Ferré et aultres denommez par le contract de constitution constituee pour la somme de deux cens escuz et en cas d’admortissement seront les deniers quy en proviendront remployez poursatisfaire au present article [4r°] et le reste montant dix livres pour les augustins pour la messe de sabmedy pour feue madite femme a la charge que lesdits Augustins yront aux Cordelliers sur dire ung subvenite le jour de mon deces et de ce je les en prye / Le tout montant cinquante livres payables par mesdits heretiers ou leur bailler de mes rentes en payement dont lesdits relligieulx desdits couvent ce contenteront appellant l’ung de mesdits heretiers a chacun service ou bien ou bien l’huisser Le Febvre mon bon et loyal et parfaict amy
Auquel l’huissier Lefebvre les sieurs [blanc] et aux sieurs mon bon amy et serviteur les sieurs je donne a perpetuité et a son filz Martin Lefebvre pour m’avoir tousiours asisté et faict compaignie et pour avoir conservé mon bien par son bon mesnage la somme de cinquante livres tournois de rente que me doibt Jehan Ferré son beau frere ou bien pareille somme de rente montant [en] principal VI^c livres une foys payés sur de mesdites aultres rentes et biens.
Item, je donne a perpetuité aultres cinquante livres de rente que me doibt Nicolas Fauvel, maitre tailleur pour aquit au petit Martin Lefebvre mon filleul et a ses enffans pour l’affection que je porte a son pere et si ladite rente estoit admortye aultre pareille somme de rente et montant en principal VI^c livres de mesdites rentes et biens et si ledit Martin ne survivoit son pere [4v°] ladite somme de VI^c livres reviendra a mes heretiers et si sondit pere le survit ladite somme de CI^c livres ser il prandra ladite somme et ces enffans venant dudit Urban Lefebvre et en ces deffaulz deffault d’enffens venant dudit l’huyssier Le Febvre et dudit Martin ladite rente retournera a mesdits heretiers Je donne audit l’huissier Lefebvre mon bon amy et serviteur en meuble ce qu’il s’ensuict pour me l’avoir bien conservé durant les troubles et depuys en toutes mes maladies savoir XXX gitons d’argent d’un cent que j’ay de la chambre des comptes de Bretaigne / la couchette de ma chambre garnye d’une d’une cochette et chenet de plume d’un d’un de une mante blanche du pavillon de soyette verte / deux petitz draps de lin / et douze petitz drapdz de pou / dont il y en aura six neufz et six vieulz des meilleurs / mon oriller et six soulles d’orillers / deux douzaines de mes bonnes chemises / deux nappes de lin deux douzaines de servietes de lin du compte d compte de veu estant du compte de la servante et demy deux servietes larges de la petite chambre / quatre nappes longues et huict petites des plus neufves avecques quatre douzaines des de serviettes le tout de pouet des meilleures / En argent quarente escuz sol. / plus je donne audit l’huissier mon bon amy une robbe de deuil chapperon soye une payre de chausses ung pourpoint de futaine de Millan / ung reystre le tout de mon drap de dix [5r°] francs l’aulne pour le moings et a son filz je veulx qu’il soyt habillé comme son pere / et cepour la fidelité et bonne asseurance que j’ay de luy qu’il priera dieu a tout jamays pour le repoz de mon ame et bons amys et pour l’avoir tousiours trouvé vray et fidelle et amy et serviteur / luy recommandant en tant qu’il m’est possible son petit filz Martin / mon filleul
Je prye mes nepveuz des La Chastiere, le soubsdoyen de La Fontaine et son frere l’enquesteur avoir lesdictz h huissier Lefebvre et son filz en recommadition et luy estre aydant en toutes ces affaires en ma fer faveur / et ce pour la derniere priere que je leur feray
Je donne a Marie Fouquet quatre six escuz sol. une robbe et ung chapperon de bon drapd noyr avecques quatre petitz drapdz de couchecte / et a son filz ung habillement neuf /
Je donne a Michel Apvril son mary aultres quatre escuz une robbe et chapperon une payre de chausses le tout de bon drapd / a la charge de porter mon seau en mon enterrement assister aux services en priant Dieu pour le repoz eternel de mon ame /
Je prie mesdits nepveus et aultres heretiers de porter le deuil suyvant les bonnes coustumes de noz predecesseurs qui a esté maintenue et observee jusques a ce temps miserables des troubles [5v°] et lesquelz je prye de rechef de ne me faire ceste honte de ce porter heretiers par beneffice d’inventaire ce qui se faict a ceulx qui ont mainés plusieurs affaires et pour aultres causes que aux on peult bien entendre et en ce cas je donne la part de ceulx la qui ne porteront le deuil a mon bon amy l’huissier Lefebvre comme [Main du notaire :] et ceulx de mes pretendez heretiers quy ne viendront a l’eglise catholicque je ne veil qu’ilz particippent en ma succession.
Je donne aux pauvres de ceste ville C sous par chacune service et pareille somme au bout de l’an et pour esviter confussion envoyrez la somme partie a l’hostel Dieu et partye aux pauvres honteux.
Item je ordonne mes executeurs mesdits nepveuz de La Chastiere, le soubzdoyen de La Fontaine son frere et mon bon compere le seigneur de La Guyriniere avecques mon bon amy l’huissier Lefebvre pour les soullaiger aux quelz je donne pouvoyr et a chacun d’eux pouvoir puissance et aucthorité d’executer ce present mon testament et dernier vollunté et en prye mesdits nepveuz et mondit compere de lagr La Guyriniere de ce present faire et que ledit Lefebvre leur assiste pour faire ce que par eulx sera requis / je prye mesdits nepveus et heritiers de faire mectre une epitaffe ou tombe pres ausdits couvent des Cordelliers pour la memoyre des trespasses qui y sont inhumez /
[Dans une nouvelle main :] Je donne a Jehanne ma servante pareille somme que ce montent ses gaiges avec une robe et ung chapperon de drap noyr [6r°] et a Jehan pareil somme que ce montent ses gaiges j’entend Jehan Normant a present mon serviteur faict et arresté ce present mon testament et ordonnance de derniere volonté escript et dicte de longtemps de ma main et lequel ay leu et releu ce jourd’huy douzeiesme jour de mars mil V^c quatre vingtz cinq entendz et veuz qu’il soyt entierement executé selon sa forme et teneur ce que je prye a mesdits executeurs faire et acomplir.
M de M de M de M. de Beaune
[L’acte continue dans une main qui n’est pas celle de Martin :] Item, je veil et ordonne que mon nepveu de La Chassetiere ayt et preigne sur mon bien avant qu’il soyt faict aucun partaige entre mes aultres heretiers six marcs d’argent que j’ay receu pour luy long temps a et aussi qu’il preigne avant ledit partaige le contenu d’une ceddulle qu’il a de moy montant six ou sept vingtz livres.
Et cejourd’huy mercredi treze^e dudit moys de mars et an mil V^c quatre vingtz cinq, ledit De Beaune, seigneur de La Charmaye, estant au lict malade toutesfoys sain d’esprit et entendement comme il est appareu a moy notaire soubzsigné et tesmoings cy dessoubz signez m’a requis voulloir signer le testament cy dessus qu’il a declairé avoir escript et signé de sa main fors quelques motz qui ont esté escriptz de moy a la requeste dudit sieur de La Charmaye ce que luy ay accordé et faict apres que luy auy leu et releu et qu’il a declaré icelluy bien entendre pour l’avoir escript et signé et declairé n’avoir esté subgeré dicte ne nomme d’autre personne que de luy et lequel il a declaré et declaire [6v°] qu’il veult et entend estre executé et sortyr son plain et entier effect faict en la maison dudit sieur de La Charmaye, paroisse Saint-Hillaire dudit Tours , d’avant midi es presences de Francoys Goullet, serviteur dudit sieur de La Chassetyere, et Denys Chanvyer, maitre boullanger audit Tours , en ladite parroisse Saint-Hillaire, tesmoings.
Constat entre ligne tua rendre universelle en teste auquel / a perpetuité et a son filz Martin Lefebvre payés aultres et a ses enffens venant de Urbain Lefevre dudit Martin de plume de pou deux de serviettes pour le repoz detrouvé six et observant en teste qui ne porteront le deuil et ce qui est escript de moy s’ensuit l’enterrement sesheritaiges et biens immeubles speciallement sur cinquante livres tournois de rente constituee par Baudrees de Maille, Jehan Ferré et aultres denommez par le contract de constitution constiutee pour la somme de deux cens escus et en cas d’admortissement seront les deniers qui en proviendront remployez pour satisfaire a ce present article et ceulx de mes heritiers que ne viendront a l’eglise catholique je ne veil qu’ilz participent en ma succession queapprouve.
[Signé :] M. De Beaune, Denis Chaulmyer pour present, F. Goullet, Perdriau, notaire royal a Tours .