[f° 111, v°] Les esleuz pour le Roy notre seigneur sur le fait de la justice des aydes et tailles en l’eslection de Tours aux manans et habitants de la ville d’Amboise ou a leurs procureurs, salut, [f° 112] faisons que nous avons receu les lettres patantes dudit seigneur donnees a Paris le XIIII^e jour de fevrier dernier passé, signees Henry et par le Roy en son conseil, Bourdin⁽¹⁾ et scellees sur simple queue de grant sel de cire jaulne attachees soubz le contresel a autres lettres patantes dudit seigneur donnees a Amboise le XXVII^me jour de mars mil cinq cens cinquante cinq avant pasques aussi signées Henry et par le Roy en son conseil De l’Ab L’Aubespine⁽²⁾ par lesquelles et pour les causes cy contenues ledit seigneur desirant la perfection des reparations et entiere reffection et ediffication des ponts de long temps encommancez au lieu de Nazelles pres la ville d’Amboise comme chose qui scait estre tres utille et necessaire et qu’il en est tres grand besoing ainsy que ledit seigneur mesmes a veu a l’œil, nous est mandé que jusques a la perfection entiere desdits ponts de Nazelles nous ayons a procedder le plus dilligemment que faire se pourra a cotiser et imposer sur tous et chacuns les manans et habitants de ladite ville et faulxbourgs dudit Amboise / ^(a) Bleré / la Croix de Bleré⁽³⁾/ Athees⁽⁴⁾/ Chisseau⁽⁵⁾/ Chisse⁽⁶⁾/ Montrichart / Chasteauregnault⁽⁷⁾/ Nazelles / Negron / Reugny , Noizet⁽⁸⁾, Vernou , Chamray⁽⁹⁾/ Sainct-Laurens-en-Gastine⁽¹⁰⁾/ Noizelle⁽¹¹⁾/ Chemisson⁽¹²⁾/ Marray / Loytault⁽¹³⁾/ Monnoye⁽¹⁴⁾/ Neuillé le Lierre / Neufuille⁽¹⁵⁾/ Vouvray / Sainct-Nicollas-Des-Mothelz⁽¹⁶⁾/ Sainct-Estienne-des-Gueretz⁽¹⁷⁾/ Moran⁽¹⁸⁾/ Saunay / Auzouer / Sainct-Cir-Dugault⁽¹⁹⁾/ dame Marie Duboys⁽²⁰⁾/ Villedomer / Villechaune⁽²¹⁾/ Saint Oyn Duboys⁽²²⁾/ Monthreuil⁽²³⁾/ Ville Percher⁽²⁴⁾/ Autresche / Sainct-Relle⁽²⁵⁾/ Souvigné sur Amboise / Dierre / Sainct-Martin-le-Beau / Laler⁽²⁶⁾/ Vouvray / Faverolles / et chargé exempts et non exempts, privillegiez et non privillegiez sans prandre touteffoiz de leurs privilleiges en autres choses la somme de deux solz tournoiz pour livre de cinquante, monte et pourrat montrer leur part et portion dudit principal [f° 112, v°] de la taille a commancer du premier jour d’apvril dernier passé et iceulx deniers faire cueillir et lever par le receveur de ses aides et tailles en notredite eslection aux mesmes pieces et payemens desdites tailles pour iceulx deniers receuz estre convertiz et employez au parachevement desdits ponts de Nazelles et non ailleurs ainsi que le tout est plus a plan contenu et declaré esdites lettres a laquelle raison avons trouvé votre paroisse devoir porter pour vingt et ung moys qui sont sept quarterons qui finirr finiront le dernier jour de decembre mil cinq cens cinquante sept prochain venu la somme de deux cens quarente cinq livres tournois payable savoir est les deux premiers quarterons de ladite somme le premier jour d’avril prochain venu et les troys quarterons le premier jour du moys de juillet et les autres deux et derniers quarterons le premier jour d’octobre ensuyvant. Laquelle somme avecques douze deniers pour livre pour le droict de collectaige si mys n’est au rabays et les fraiz raisonnables qu’il conviendra lever pour faire les rolles et departement d’icelles sommes aumoings que faire se pourra. Vous mandons imposer sur vous et chacun de vous a ladite raison de deux sols tournoiz pour livre de ce que monte et pourroit monter les taux du principal de ladite taille, exempts et non exempts, previllegiez et non previllegiez, sans prejudice touteffoiz de leurs privilleges en autres choses et si aucuns s’en voulloient dire exempts, vous attendre que c’est chose qui concerne la commeune utillité et dont ilz recoipvent leur part de proffit, ne laisserez de les y cotiser ayant esgard a leurs facultez et a ce qu’ilz pourroient porter de nosdites tailles sans ladite exemption selon qu’il est mandé par lesdites lettres et le departement ; faire [f° 113] envoyez les rolles par devers nous pour estre signez et expediez en la maniere acoustumer et estre baillez aux collecteurs de la taille de l’annee presente pour cuillir, lever et amasser lesdits deniers et iceulx payer audit receveur des aydes et tailles aux termes susdits et a ce faire les desnommez esdits rolles estre contraints au payement de leurs taux, parts et portions comme pour les propres deniers et affaires du Roy notredit seigneur nonobstant oppositions et appellations quelzconques ledit seigneur a reserv quelzconques et sans prejudice d’icelles le jugement et decision desquelles oppositions ou appellations ledit seigneur a reservé a luy et a son conseil privé le tout pourveu que les deniers dudit seigneur non soient retardez. Donné a Tours par nous esleuz susdits le XVII^me jour de mars l’an mil cinq cens cinquante six, ainsy signé Joubert /^(b)

(a) Signe de ponctuation ajouté par le scribe. — (b) Signe de ponctuation ajouté par le scribe.
(1) Jacques Bourdin, secrétaire d'État — (2) Claude de l'Aubespine, notaire et secrétaire du roi. — (3) Correspondant aujourd'hui à la commune de la Croix-en-Touraine . — (4) Correspondant aujourd'hui à la commune d'Athée-sur-Cher . — (5) Correspondant aujourd'hui à la commune de Chisseaux . — (6) non-identifiée. — (7) Correspondant aujourd'hui à la commune de Château-Renault . — (8) Correspondant aujourd'hui à la commune de Noizay . — (9) Correspondant probablement à la commune actuelle de Chambray-lès-Tours . — (10) Correspondant aujourd'hui à la commune de Saint-Laurent-en-Gâtines . — (11) non-identifiée. — (12) non-identifiée. — (13) non-identifiée. — (14) Correspondant probablement à la commune actuelle de Monnaie . — (15) non-identifiée. — (16) Correspondant aujourd'hui à la commune de Saint-Nicolas-des-Motets . — (17) Correspondant aujourd'hui à la commune de Saint-Etienne-des-Guérets . —(18) Correspondant probablement à la commune actuelle de Morand . —(19) Correspondant aujourd'hui à la commune de Saint-Cyr-du-Gault . — (20) Correspondant aujourd'hui à la commune de Dame-Marie-des-Bois. — (21) Correspondant aujourd'hui à la commune de Villechauve . —(22) Correspondant aujourd'hui à la commune de Saint-Ouen-les-Vignes . — (23) Correspondant aujourd'hui à la commune de Montreuil-en-Touraine . —(24) non-identifiée. —(25) Correspondant probablement à la commune actuelle de Saint-Règle . — (26) non-identifiée. —